Ils 30 da settember ei la catscha aulta da quest onn ida a fin. Sur 5'000 catschaduras e catschadurs ein stai a catscha. Certins cun bia, auters cun pauc cletg. Denter quels eran era uonn biars catschadurs giuvens, vul dir da quels ch’eran per l’emprema gada silla catscha.

Per insumma astgar ir alla catscha, ston ins far il patent da catscha. Premissa ei da haver silmeins 19 onns, ed ins sto haver in schuber register penal. Ein quels puncts dai, s’annunzian ins tier il survigilader da catscha che dat la lubientscha.

Il cuors dall’instrucziun tier in catschadur consista da treis parts. Gl’emprem ston ins prestar 50 uras per tgirar animals e cultivar igl uaul.
La proxima part ei l’applicaziun dall’arma. Ella ei partgida si en duas parts: Ella part teoretica vegnan tractadas: las differentas armas, la muniziun e las leschas pertuccontas. Tier la part pratica vegn allura sittau cun endretga muniziun. Culla buis da catscha sittan ins sin 80 meters, culla flinta sin 30 meters. Entschatta uost ha lu il examen liug. Tgi che fa buc ella tier l’emprem’emprova ha aunc duas schanzas.
Ella tiarza e davosa part cumpiglia l’enconuschientscha dallas leschas, dalla catscha en general, selvaschinas e natira.
Han ins dumigniau omisdus examens, astgan ins senumnar catschadur.